Roma Papası Fələstin xalqının dərdini bölüşür və atəşkəs istəyir

Qəzzaya hücumlar davam edir.

Hazırda Yaxın Şərqdə humanitar vəziyyət heç də ürəkaçan deyil. Dünya ölkələri İsrail tərəfini müharibəni bitirməyə səsləyib.

Avropa Komissiyasının xarici işlər və təhlükəsizlik siyasəti üzrə ali nümayəndəsi və vitse-prezidenti Kaya Kallas yeni sanksiyalar paketini təqdim edib.

Münaqişənin bitməsinə səsləyən K.Kallas HƏMAS üzvlərinə, İsrail hökumətindəki ekstremist nazirlərə və İordan çayının qərb sahilində insanların zorla məskunlaşdırılmasına şərait yaradan qurumlara qarşı sanksiyalar tətbiq olunacağını açıqlayıb.

Vitse-prezident bu sanksiyaların tətbiqi və ticarət güzəştlərinin dayandırılmasında əsas məqsədin İsraili günahlandırmaq olmadığını da diqqətə çatdırıb.

“Ən vacib məqam Qəzzada humanitar vəziyyətin yaxşılaşdırılmasıdır. Müharibə bitməli, girovlar azad edilməlidir”, – deyə Kaya Kallas vurğulayıb.

Növbəti yardım çağırışı Roma Papası XIV Leo tərəfindən səsləndirilib.

“Qorxu içində yaşamağa davam edən və bir daha torpaqlarını tərk etmək məcburiyyətində qalan Fələstin xalqına dərin hisslərimi bildirmək istəyirəm. Mən atəşkəs, girovların azad edilməsi, danışıqlar yolu ilə məsələnin həll edilməli olduğunu nəzərinizə çatdırıram”, – deyə Roma Papası qeyd edib.

Qəzzaya daha bir beynəlxalq dəstək isə BMT-nin Baş katibi Antonio Quterreşdən gəlib.

“Əvvəla, Fələstin dövlətinin tanınması HƏMAS-a yox, Fələstin xalqına hədiyyədir”.

Bu sözləri Antonio Quterreş İsrail tərəfini müharibəni dayandırmağa çağırarkən bildirib.