Rusiya bu şəhərlərə kütləvi hücuma keçdi | Ukrayna Ordusundan qisas zərbəsi

Rusiya Silahlı Qüvvələri iyulun 18-dən 19-na keçən gecə Ukraynanın Odessa şəhərini kütləvi dron hücumuna məruz qoyub. Hadisə nəticəsində bir nəfər vəfat edib, yaralıların sayı dəqiqləşdirilir.

Bu barədə Odessa vilayətinin Fövqəladə Hallar üzrə Dövlət Xidməti məlumat yayıb.

Çoxmərtəbəli yaşayış binasında baş verən yanğın zamanı mənzildə olan beş ailə üzvündən birini xilas etmək mümkün olmayıb.

Dnepropetrovsk vilayətinin qubernatoru Sergey Lısak bildirib ki, Rusiya Pavloqrad şəhərini də gecə raket və PUA ilə kütləvi atəşə tutub. İaşə obyektlərində, yaşayış binasında yanğın baş verib. Raket hücumu səbəbi ilə Donetsk vilayətində isə beş nəfər ölüb.

Rusiya Müdafiə Nazirliyindən isə bildirilib ki, Hava Hücumundan Müdafiə qüvvələri gecə ərzində Ukraynanın 71 təyyarə tipli PUA-sını məhv edib. Onlardan 16-sı Moskva üzərində vurulub.