Rusiya dronlarla Ukraynaya hücum etdi | Zərbələrin nəticələri açıqlandı

Avqustun 23-ü səhər saatlarında Rusiya Ordusu Ukraynanın paytaxtı Kiyevə dronlarla hücum edib. Paytaxt sakinlərinə PUA təhlükəsi barədə xəbərdarlıq olunub.

Kiyev şəhərinin meri Vitali Kliçko özünün “Telegram” kanalında paylaşım edərək bildirib ki, ilkin məlumatlara görə, Rusiyaya məxsus pilotsuz uçuş aparatı paytaxtın Solomensk rayonunda yerə düşüb.

“Yanğın qeydə alınıb. Təcili xidmətlər hadisə yerinə göndərilib, Hava Hücumundan Müdafiə qüvvələri işləyir. Sığınacaqlarda qalın”, – deyə V.Kliçko bildirib.

Ukrayna mediasının məlumatına görə, gecədən başlayaraq Rusiya qüvvələri Ukraynaya kamikadze dronları ilə genişmiqyaslı hücum təşkil edib. Əsas zərbələr ölkənin şərq və şimal bölgələrinə endirilib. Ukrayna ərazisinə buraxılan 49 müxtəliftipli drondan 36-sı Hava Hücumundan Müdafiə qüvvələri tərəfindən vurulub.

Bununla yanaşı, ölkənin Xarkov vilayəti də hücuma məruz qalıb. Hadisə nəticəsində 2 mülki şəxs vəfat edib.

Rusiya Silahlı Qüvvələri Donetsk vilayətində isə Dobropolye şəhərində yanğınsöndürmə məntəqəsinə PUA zərbəsi endirib.

Rusiya Müdafiə Nazirliyindən isə bildirilib ki, avqustun 23-nə keçən gecədən səhərə qədər ölkənin Hava Hücumundan Müdafiə qüvvələri Ukraynaya məxsus 26 PUA-nı məhv edib.