Rusiya hərbçiləri “məğlubedilməz düşmən”lə üz-üzə qaldı!

“Biz təslim olmaq istəyirik”. Bu sözlər karton üzərində yazılıb.

Yazını Ukraynaya aid pilotsuz uçuş aparatları cəbhədə qeydə alıblar.

“The Washington Post”da yayılan məqalədə qeyd olunub ki, hadisə Rusiya hərbçilərinin nəzarətində olan Ukrayna ərazisində yaşanıb.

İyun ayında Rusiya hərbçiləri yenilməz düşmənlə qarşılaşıblar. Söhbət çox da böyük olmayan təkərli robotdan gedir. 62 kiloqram partlayıcı ilə təchiz olunan robot Rusiya hərbçilərini əsir götürüb. Ardınca isə robot vasitəsilə Xarkovda uçan PUA-ya məlumat ötürülüb.

Məqalədə qeyd edilib ki, Ukrayna ordusu döyüşlərdə robotlardan istifadə edir, amma bu, robotun işğal olunan ərazini azad edib Rusiya hərbçilərini əsir götürdüyü ilk haldır.

Ümumiyyyətlə Ukraynanın 3-cü hücum briqadası belə əməliyyatlar həyata keçirir. Robot və PUA-lar vasitəsilə yaşayış məntəqələrinin azad olunması həm də hərbçi itkisinin qarşısını alır.

“The Washington Post”da qeyd olunub ki, döyüşlərdə PUA və robot istifadəsi müasir savaş taktikalarını dəyişir. Ukrayna isə gələcək münaqişələr üçün sınaq laboratoriyasına çevrilib.

Hazırda şəxsi heyət azlığına görə robotlara ehtiyac artıb. Bu robotlar radiosiqnal vasitəsilə idarə olunur. Hətta soba boyda olan robotlar döyüşlərdə 2-3 əsgəri üstələyə bilir.

Yerüstü dronlar da istifadə olunur. Ukrayna ordusunda olan “Tarqan” dronları ərazini minalaya, logistika işləri görə və hədəfləri məhv edə bilər.