Rusiya Kiyevə raket yağdırdı | Dəhşətli hücumun detalları

“Rusiya Ordusu iyulun 31-də Kiyevə 8 “İskəndər-K” raketi atıb. Qanadlı raketlərdən üçü vurulub”.

Bunu Ukrayna Silahlı Qüvvələrinin idarə rəisi Yuri İqnat deyib.

“Bütün raketlərin təhlükəli olduğunu anlamaq lazımdır. Elə raketlər var ki, onların zərərsizləşdirilməsi asan, bəzilərini isə vurmaq çətindir. Kiyevə “İskəndər-K” qanadlı raketləri ilə zərbələr endirilib. Rusiyanın istifadə etdiyi digər populyar raketlər “X-101” və “Kalibr”dir. Bənzər səviyyəli raketlərdir, amma vurulma effektivlikləri fərqlidir. “X-101” və “Kalibr”lər daha çox zərərsizləşdirilir. “İskəndər-K”nı isə məhv etmək asan olmur. Həm də bu qanadlı raket “İskəndər-M” ballistik raketi qədər təhlükəlidir.

“İskəndər-K”lar daha çox Kursk istiqamətindən buraxılır, o vilayət isə Kiyevdən elə də uzaqda yerləşmir. Yəni raketin müəyyənləşdirilməsi və zərərsizləşdirilməsinə çox vaxt qalmır”, ‒ deyə Y.İqnat 5 raketin vurulmamasının səbəblərini izah edib.

Onun sözlərinə görə, son sutkada Rusiyaya aid 290 PUA zərərsizləşdirilib. Rusiyanın reaktiv “Şahed” dronlarından istifadə etdiyi də ehtimal olunur. Reaktiv dronlar qanadlı raket kimidir, çünki saatda 500 kilometr sürət yığa bilirlər.

Qeyd edək ki, iyulun 31-də Rusiyanın Kiyevə hücumları nəticəsində 8 nəfər ölüb, 124 sakin xəsarət alıb.