Rusiya niyə çox itki verir? | Ukrayna Ordusu mühasirədən çıxmaq üçün...

Rusiya Ordusu Ukraynanın Konstantinovka şəhərinə hücumları azaldıb.

ABŞ-nin Müharibənin Öyrənilməsi İnstitutunun analitiklərinin fikrincə, buna səbəb Rusiya Ordusunun hücum planlarının dəyişməsidir. Çünki hazırda Ukraynanın Pokrovsk və Mirnoqrad şəhərlərinin ələ keçirilməsi istiqamətində əməliyyatlar aparılır.

Rusiya Ordusu Pokrovskun cənub-şərqində irəliləyə bilib. Hərbi əməliyyatlar zamanı şəhərlərə PUA hücumları həyata keçirilir və artilleriya sistemləri vasitəsilə zərbələr endirilir. Quru qoşunları isə xırda dəstələr vasitəsilə hücum edir.

Rusiyalı blogerlərin məlumatına görə, Pokrovskun şimal-şərq hissəsi də nəzarətə götürülüb. Mirnoqradın da şimal və cənub-şərq hissələri ələ keçirilib. Ukrayna Ordusu Zatışka yaşayış məntəqəsində Rusiyanın geri çəkilməsinə nail olub.

Pokrovskdakı Ukrayna batalyonunun komandiri qeyd edib ki, Rusiya hərbçiləri müdafiə xəttini dolayısı ilə yarmağa çalışırlar. Çünki üzbəüz gələndə çox itki verirlər.

“Hücumlarda təlim keçməmiş əsgərlər qurban kimi önə atılır, nəticədə, əsas piyada dəstələri PUA və artilleriya zərbələrindən yayınmış olur”, – deyə məlumatda bildirilir.

Bundan başqa, Pokrovsk istiqamətində Rusiyanın üç hərbi dəstəsi cəmləşib. Belə olan halda isə Ukrayna hərbçilərinin Rusiyanı Pokrovskdan sıxışdırıb çıxarması çətinləşir. Hazırda isə ukraynalı hərbçilər mühasirədən çıxmaq üçün vaxt udmağa çalışırlar.