Rusiya ordusu hücuma keçdi | Ali Radanın kommunal sistemi dağıdıldı - Baku TV

Rusiya Kiyevə kütləvi hava hücumları həyata keçirib. Nəticədə Ukrayna Ali Radasının kommunal sisteminə ciddi ziyan dəyib.

Hava zərbələri zamanı Ukrayna parlamentinin işıq, istilik və su təchizatı sıradan çıxıb. Ali Radadan bildirilib ki, hazırda parlament fəaliyyətini davam etdirir və kommunal xətlər təmir olunur.

Bu arada, Ukrayna fevral ayından etibarən ayda 1000 ədəd "Octopus" dron əleyhinə vasitələrin istehsalına başlayacağını açıqlayıb.

Ölkənin müdafiə naziri Denis Şmıqalın sözlərinə görə, razılaşma Böyük Britaniyanın müdafiə naziri Con Hilinin Kiyevə səfəri zamanı təsdiqlənib, orada tərəflər Ukrayna və Böyük Britaniya arasında müdafiə sahəsində yüzillik tərəfdaşlığın inkişafı üzrə yol xəritəsini imzalayıblar.

Görüş zamanı həmçinin hava hücumundan müdafiə və uzaqmənzilli silahlar sahəsində birgə strateji sənaye layihələrinin başladılması imkanları, Böyük Britaniya şirkətlərinin texnologiyalarından istifadə edərək "Gripen" qırıcılarının istehsalının lokallaşdırılması perspektivləri, Ukraynanın dəniz məkanının müdafiəsinin gücləndirilməsi və fevral ayında "Ramştayn" formatında keçiriləcək iclasa hazırlıq müzakirə olunub.

Ukraynanın müdafiə naziri Böyük Britaniyaya dəstəyinə görə təşəkkür edib və ikitərəfli müdafiə əməkdaşlığının inkişafında Con Hilinin şəxsi rolunu qeyd edib.