Rusiya Ordusunun 920 hərbçisi məhv edildi

Rusiya ilə Ukrayna arasında hazırkı cəbhə xətti boyunca şiddətli döyüşlər qeydə alınıb. Ukrayna Ordusu sutka ərzində Rusiyanın 920 hərbçisini məhv edib. 

Ukrayna paytaxtı Kiyev yenə hücuma məruz qalıb. Oktyabrın 23-ü gecə saatlarında Rusiya Ordusu pilotsuz uçuş aparatları ilə Kiyevi atəşə tutub. Bəzi rayonlarda yaşayış binalarında partlayış və yanğınlar qeydə alınıb. İlkin məlumata görə, 7 nəfər xəsarət alıb.

Xarkova da hava zərbələri endirilib. 5 nəfər yaralanıb. Yaşayış binalarından birində yanğının qarşısı alınarkən Rusiya Ordusu dronlar vasitəsilə ukraynalı xilasediciləri də hədəf alıb. Nəticədə Fövqəladə Hallar Nazirliyinin bir əməkdaşı həlak olub, 5-i yaralanıb. 

Ukrayna Ordusu da Rusiyaya PUA hücumu həyata keçirib. Rusiya Müdafiə Nazirliyinin məlumatına görə, sutka ərzində 139 dron zərərsizləşdirilib. Dronlardan 56-sı Belqorod səmasında vurulub. Digər PUA-lar Bryansk, Voronej, Ryazan, Rostov, Tambov, Volqoqrad, Orlov, Kaluqa, Kursk və Krım səmasında məhv edilib.