Rusiya Polşa hava məkanını pozdu! - Ölkə təcili əməliyyat başlatdı!

Sentyabrın 9-dan 10-na keçən gecə və səhər saatlarında Rusiya silahlı qüvvələri Ukrayna ərazilərini dron və raketlərlə atəşə tutub.

Raket hücumu ilə bağlı bütün ölkə üzrə hava həyəcan siqnalı səsləndirilib. Qanadlı raketlər əsasən Kiyev, Sumı, Poltava, Çerkassı, Jitomir, Vinnitsanı hədəf alıb.

Ukrayna silahlı qüvvələrinin baş qərərgahından bildirilib ki, son sutka ərzində Rusiyanın 990 hərbçisi öldürülüb və 29 artilleriya sistemi məhv edilib.

Rusiya Müdafiə Nazirliyindən vurğulanıb ki, sentyabrın 9-dan 10-a keçən gecə hava hücumundan müdafiə qüvvələri Ukraynaya məxsus 122 PUA-nı zərərsizləşdirib.

Bununla yanaşı, Polşa qırıcı təyyarələrinin gecə saatlarında hava məkanını pozan ən azı 4 pilotsuz təyyarəni vurduğu bildirilir.

Ölkənin Baş naziri Donald Tusk “X” hesabında paylaşım edərək bildirib ki, Polşa hava məkanının çoxsaylı pozulması ilə bağlı əməliyyat aparılır. Polşanın hava məkanına naməlum obyektlərin daxil olması səbəbi ilə Varşava və Rzeşov şəhərlərində hava limanları bağlanıb.

Kiyevdən isə bildirilib ki, Rusiyanın bir neçə pilotsuz uçuş aparatı Ukrayna üzərindən Polşa istiqamətində uçub.