Rusiya PUA-ları Ukraynanın Milli Elmlər Akademiyasının binasını hədəfə aldı - Baku TV

Ukrayna paytaxtı Kiyevə dron hücumları yenidən intensivləşib.

Son 14-15 saat ərzində demək olar ki, hər saat davam edən hücumlar nəticəsində xüsusilə Kiyevin mərkəzində ciddi fəsadlar qeydə alınıb.

Ukrayna Milli Elmlər Akademiyasının əsas binası da dron zərbəsinə məruz qalıb. Hücum nəticəsində ölən və yaralananların olduğu bildirilir. Onların dəqiq sayı hazırda müəyyənləşdirilir.

Sentyabrın 28-də davam edən dron hücumları zamanı Ukraynanın rəqəmsal infrastrukturu ilə yanaşı, ərzaq və digər məhsulların saxlanıldığı anbarların da hədəfə alındığı bildirilir.

Ukrayna Fövqəladə Hallar Xidmətinin rəsmisi Pavlo Petrov qeyd edib ki, saat 13:30 radələrində Ukrayna Milli Elmlər Akademiyasının üçmərtəbəli binasına zərbə endirilib.

Onun sözlərinə görə, birbaşa zərbə nəticəsində binanın ikinci və üçüncü mərtəbələri qismən dağılıb. Ümumi sahəsi 900 kvadratmetr olan ərazidə yanğın baş verib.

Hazırda bir nəfərin öldüyü, ən azı dörd nəfərin yaralandığı məlumdur. Yanğınsöndürənlər hadisə yerinə çatanda pəncərələrdə insanların olduğu və açıq alovun müşahidə edildiyi bildirilib.

Üçmərtəbəli pilləkənlərin köməyi ilə pəncərələrdən ən azı iki nəfəri xilas etmək mümkün olub. Yanğının söndürülməsinə 25 texnika və 100-dən çox şəxsi heyət cəlb edilib.

Pavlo Petrovun sözlərinə görə, Kiyev şəhəri təxminən 30 gündür dron və raket hücumlarına məruz qalır.