Rusiya-Ukrayna müharibəsi bu tarixdə bitəcək? - Trampın alınmayan planı

ABŞ Prezidenti Donald Tramp Ukrayna üzrə xüsusi nümayəndəsi Kit Kelloqa Ukrayna münaqişəsini 100 gün ərzində başa çatdırmaqla bağlı tapşırıq verib.

Bu barədə “The Wall Street Journal” qəzeti məlumat yayıb.

Bildirilib ki, Rusiya Prezidenti Vladimir Putinlə razılaşmanın əldə olunması D.Trampın təsəvvür etdiyindən daha çətin olacaq. Çünki o, seçkiqabağı kampaniya zamanı dövlət başçısı kimi vəzifəyə başlayana qədər münaqişəyə son qoyacağını bəyan edirdi, lakin bu baş tutmadı.

Əlavə olunub ki, Amerikanın yeni lideri Ukrayna üzrə danışıqlar prosesinin gedişinə özü nəzarət etmək niyyətindədir. K.Kelloqun keçmiş həmkarları onun müstəqil fiqur olmadığını və tamamilə Prezidentin fikrindən asılı olduğunu iddia edirlər. Bu səbəbdən K.Kelloq guya ABŞ ilə Rusiya arasında hər hansı real danışıqlara buraxılmayacaq.

Xatırladaq ki, Donald Tramp yanvarın 21-də mətbuat konfransı zamanı jurnalistin “Bildirmişdiniz ki, prezident seçildikdən sonra Rusiya-Ukrayna münaqişəsini 24 saat ərzində həll edəcəksiniz” xatırlatmasına “Hələ günün yarısını geridə qoymuşuq, qarşıda yarım gün var. Çatdırmağa çalışıram”, – deyə zarafatla cavab verib.