Rusiya Ukraynanın paytaxtına kütləvi dron və raket hücumu etdi

Rusiya Ordusu yanvarın 8-dən 9-na keçən gecə Ukraynanın paytaxtı Kiyev də daxil olmaqla, ölkənin bir çox şəhərlərinə yenidən kütləvi dron və raket hücumları edib.

Hücum nəticəsində xəsarət alanların sayı 25 nəfərə çatıb.

"Rusiyanın bu gün Kiyevə hücumu nəticəsində 4 nəfər həlak olub, daha 25 nəfər yaralanıb. Yaralılar arasında tibb işçiləri, xilasedicilər və bir polis əməkdaşı var", – deyə məlumatda qeyd olunur.

Hücum nəticəsində 19 çoxmənzilli bina, bir səfirlik binası, tramvay deposu, avtomobillər, supermarket və yanacaqdoldurma məntəqəsi zədələnib.

Ardıcıl hücumlar zamanı kömək göstərmək üçün hadisə yerinə gedən bir tibb işçisi həlak olub, bir neçəsi yaralanıb. Eyni zamanda Dnepr rayonunda üçmərtəbəli yaşayış binasına dron zərbəsi endirilib və yanğın baş verib. Sakinlər binadan təxliyə edilib.

Kütləvi hava hücumları nəticəsində Ukraynanın paytaxtında ciddi humanitar böhran yaranıb, zərbələrin ardınca paytaxtın əksər rayonlarında elektrik enerjisi və suyun verilişi dayanıb.

Bununla yanaşı, artıq iki həftədir Ukrayna paytaxtında fasiləsiz qar yağıntısı və mənfi 10 dərəcəyə qədər şaxta müşahidə olunur.