Rusiya və İsrail beynəlxalq idman yarışlarından kənarlaşdırılacaq?

İspaniyanın dövlət televiziyası olan RTVE-nin idarə heyəti İsrailin tədbirdə iştirak edəcəyi təqdirdə may ayında Vyanada keçiriləcək “2026 Avroviziya Mahnı Müsabiqəsi”ndə iştirakdan imtina edilməsinə səs verib.

İspaniya Niderland, Sloveniya, İslandiya və İrlandiyadan sonra belə bir addım atan 5-ci ölkədir. Eyni zamanda Birləşmiş Krallıq, Almaniya, İtaliya və Fransanın da daxil olduğu "Böyük beşlik" adlı qrupdan İsrailə qarşı çıxan ilk ölkədir. Bu dövlətlər isə avtomatik olaraq müsabiqənin final mərhələsində iştiraka vəsiqə qazanır.

Telekanalın rəhbəri Xose Pablo Lopezin təklif etdiyi səsvermə zamanı 15 nəfərlik heyətdən 10-u bu təklifin lehinə, 4-ü əleyhinə səs verib. Bir nəfər isə bitərəf qalıb.

Qeyd edək ki, “Avroviziya” müsabiqəsində Ukrayna ilə müharibə səbəbindən iştirakı ləğv edilən Rusiyanın fonunda Qəzzaya hücumlara baxmayaraq, İsrailin müsabiqəyə qatılması bütün dünyada müzakirə mövzusu olub. 2025-ci ildə keçirilən müsabiqə zamanı İsraili təmsil edən Yuval Rafael bütün tənqidlərin fonunda 2-ci yerə çıxıb. 1-ci yerin qalibi olan avstriyalı müğənni JJ isə İsrailin 2026-cı ildə keçiriləcək yarışmadan xaric edilməsinə çağırıb.