Rusiya və Ukrayna arasında genişmiqyaslı məhbus mübadiləsi

Birləşmiş Ərəb Əmirliklərinin Xarici İşlər Nazirliyi 314 nəfərin vətənə qayıtması ilə nəticələnən yeni hərbi əsir mübadiləsinin uğurla həyata keçirilməsində göstərdikləri əməkdaşlığa görə Rusiya və Ukraynaya minnətdarlığını bildirib.

Nazirliyin açıqlamasında qeyd olunub ki, BƏƏ-nin vasitəçiliyi ilə hər iki tərəfdən 157 məhbus azad edilib. Əmirliklər Moskva və Kiyevin bu humanitar prosesdə əməkdaşlıq etməsini yüksək qiymətləndirib.

BƏƏ XİN-dən vurğulanıb ki, Ukraynadakı münaqişənin sülh yolu ilə həlli və onun ağır nəticələrinin azaldılması məqsədilə vasitəçilik səylərini bundan sonra da davam etdirəcək.

Ukrayna Prezidenti Volodimir Zelenski bildirib ki, ABŞ və Rusiya nümayəndə heyətləri ilə növbəti sülh danışıqları tezliklə keçiriləcək. "Yaxın gələcəkdə, çox güman ki, ABŞ-də əlavə görüşlər planlaşdırılır", – deyə Zelenski deyib.

Rusiya Müdafiə Nazirliyinin açıqlamasında bildirilir ki, son 24 saat ərzində Rusiyanın əməliyyat/taktiki təyyarələri, hücum pilotsuz uçuş aparatları, raket qoşunları və artilleriyası Ukrayna Ordusunun nəqliyyat və enerji infrastrukturuna, uzaqmənzilli dronların yığılması, saxlanması və buraxılış məntəqələrinə, sursat anbarlarına, eləcə də Ukrayna silahlı birləşmələrinin 148 yerdəki müvəqqəti yerləşdirmə məntəqələrinə zərbələr endirib.

Ukrayna Silahlı Qüvvələrinin Baş Qərargahından verilən açıqlamada isə qeyd olunub ki, son bir gün ərzində Ukrayna qüvvələri cəbhə xəttində 133 döyüş toqquşması qeydə alıb, Ukrayna qoşunları Rusiyanın bir neçə istiqamətdə hücumlarını dəf edib və 1351 dronu vurub.