Rusiyada Putinə qarşı aksiya | Navalnının cəsədi niyə gizlədilir?

Fevralın 16-da həbsxanada müəmmalı şəkildə dünyasını dəyişən rusiyalı müxalif siyasətçi Aleksey Navalnının anasına xəbərdarlıq edilib. Ya o, oğlunun gizli dəfn olunmasına razılıq verəcək, ya da mərhum müxalifətçi həbsxanada dəfn ediləcək.

Bu barədə siyasətçinin mətbuat katibi Kira Yarmış məlumat verib.

“1 saat əvvəl müstəntiq Alekseyin anasına zəng edərək, ultimatum verib ki, ya 3 saat ərzində o, ictimai şəkildə gizli dəfn mərasiminə razılıq verəcək, ya da Aleksey həbsxanada dəfn ediləcək. O, İstintaq Komitəsi ilə danışıqlardan imtina edib, çünki komitə onun oğlunu necə və harada basdıracağına qərar vermək səlahiyyətinə malik deyil”, – deyə Kira Yarmış vurğulayıb.

Onun sözlərinə görə, Lyudmila Navalnaya oğlunun ölümünün səbəbi müəyyən olunduğu andan sonra 2 gün ərzində müstəntiqləri meyiti təhvil verməyə məcbur edən qanuna əməl olunmasını tələb edir.

Bundan əvvəl Lyudmila Navalnaya İstintaq Komitəsinin əməkdaşlarının ondan siyasətçinin gizli dəfninə razılıq verməsini tələb etdiyini bildirən videomüraciətlə çıxış edib.

Mərhum siyasətçinin anası "Onlar dəfnin gizli şəkildə, vidalaşmadan keçirilməsini istəyirlər. Onlar məni qəbiristanlığın kənarına, təzə bir qəbrə aparıb “Oğlunuz buradadır" demək istəyirlər. Mən buna razı deyiləm”, – deyə bildirib.

Qadından dəfn mərasiminin yeri və tarixi ilə bağlı qərar verməsi də istənilib.

Bu arada, Rusiyanın məşhur simaları və ictimai fəalları sosial şəbəkələrdə "Navalnının meyitini anasına qaytar" şüarı ilə kampaniyaya başlayıblar.