Navalnının arvadından sensasiyalı açıqlama

“2024-cü ilin fevralında Alekseyin bioloji materialının nümunələrini əldə etdik və xaricə göndərdik. Azı iki ölkənin laboratoriyalarında araşdırma aparıldı. Nəticələrə görə, Aleksey Navalnı öldürülüb”.

Bunu Aleksey Navalnının həyat yoldaşı Yuliya Navalnaya deyib.

“Daha dəqiq desək, zəhərlənib. Mən susmayacağam. Mənim ərimin öldürülməsində Vladimir Putin günahkardır. Mən Rusiyanın xüsusi xidmət orqanlarını qadağan olunmuş kimyəvi və bioloji silah hazırlamaqda ittham edirəm. Araşdırma aparan laboratoriyaları nəticələri ictimailəşdirməyə çağırıram”, – deyə o qeyd edib.

Onun sözlərinə görə, Aleksey Navalnını iki dəfə zəhərləyiblər. Aleksey Navalnının ilk zəhərlənməsi Tomsk-Moskva reysində baş verib. A.Navalnı təyyarənin göyərtəsində huşunu itirib. Ardınca o, Berlinə göndərilib və müalicə olunub. Bundan sonra ABŞ, Avropa İttifaqı və Böyük Britaniya kimyəvi silah hazırlanması proqramında iştirak edən Rusiya Müdafiə Nazirliyinin müvafiq institutlarına qarşı sanksiya tətbiq edib.

Qeyd edək ki, A.Navalnı 2021-ci ilin yanvarında Rusiyaya qayıdıb və həbs olunub. Siyasətçi 2024-cü ilin 16 fevral tarixində “Qütb canavarı” adlanan xüsusi rejimli təcridxanada naməlum səbəblərdən ölüb.