Rusiyadan qalmaqallı şərtlər | Ukraynada aparılan xüsusi əməliyyat yekunlaşır?

“Hazırda bütün məqsədlərinə siyasi və diplomatik yollarla nail olmaq mümkün olmadığından Rusiya Ukraynada xüsusi əməliyyatlarını davam etdirir”.

Bunu brifinqdə Kremlin sözçüsü Dmitri Peskov Rusiya və ABŞ prezidentləri arasında aparılan dünənki telefon danışığını şərh edərkən deyib.

“Söhbət zamanı Prezident Putin bir daha təkrarladı ki, biz xüsusi hərbi əməliyyat zamanı məqsədlərimizə nail olmaqda maraqlıyıq və bunu siyasi və diplomatik vasitələrlə etmək daha məqsədəuyğundur. Amma bu, mümkün olmasa, xüsusi hərbi əməliyyatı davam etdirəcəyik”, ‒ Kremlin nümayəndəsi bildirib.

Müharibənin dayandırılması üçün Rusiyanın tələblərinə Ukraynanın denazifikasiya və demilitarizasiyası, bu ölkədə “rusdilli əhaliyə təzyiqlər”ə son qoyulması daxildir.

Bundan əlavə, Moskva Kiyevin “qeyri-nüvə və bloklara qoşulmama statusu”nda da israr edir.

Eyni zamanda Rusiya Krım, Donetsk, Luqansk, Xerson və Zaporojye vilayətlərinin işğalının Ukrayna tərəfindən tanınmasını tələb edir.