Rusiyadan Ukraynaya dəhşətli hava hücumu | Ölənlər var

Rusiya-Ukrayna müharibəsi davam edir. Priluki və Xarkov atəşə məruz qalıb.

Çerniqov vilayət administrasiyasının rəhbəri Vyaçeslav Çaus hücumların əsasən PUA-lar vasitəsilə həyata keçirildiyini deyib.

İlkin məlumata görə, 5 nəfər ölüb, onlardan ikisi qadın, biri uşaqdır. Azı 6 nəfər yaralanıb. “Qeran” tipli 6 PUA-nın hücumu nəticəsində iki yaşayış binası və bir avtomobil zədələnib.

Xarkov sakinləri də dron hücumu ilə üzləşiblər. Bu vilayətin rəhbəri Oleq Sinequbovun sözlərinə görə, 17 nəfər yaralanıb.

Rusiya Ordusu Odessanın cənubuna da PUA hücumu reallaşdırıb.

“Ukrainskaya pravda”nın yaydığı məlumata görə, sutka ərzində bütün cəbhə xətti boyunca 169 hərbi toqquşma qeydə alınıb.

Rusiya Kurskdan 31 hücum həyata keçirib. 170 artilleriya zərbəsi endirilib, 31 idarəolunan aviabomba atılıb. Pokrovskda 61 hücumun qarşısı alınıb. Xarkov, Kupyansk, Liman, Sever, Kramatorsk, Toretsk, Novopavlovsk istiqamətlərində də şiddətli döyüşlər gedir.

Ukraynaya aid dronlar isə Xersonda “Zvezda” telekanalının çəkiliş qrupunun avtomobilinə iki dəfə hücum edib. Avtomobil yanıb, çəkiliş qrupunu müşayiət edən şəxs yaralanıb.