Rusiyalı alimlər yeni ada ilə bağlı hərəkətə keçdi | Hamını şoka salan məlumatlar

Rusiya alimləri Xəzər dənizinin şimal hissəsində suyun səviyyəsinin aşağı düşməsi ilə əlaqədar yeni adanın meydana çıxdığını təsdiqləyiblər. Hazırda ada üçün ad seçilir.

Bu barədə Rusiya Elmlər Akademiyasının Şirşov adına Okeanologiya İnstitutunun Mətbuat Xidmətindən məlumat verilib.

Qeyd olunub ki, hərtərəfli ekspedisiya zamanı alimlər Malıy Jemçujnı adasından 30 kilometr cənub-qərbdə yeni adanın mövcudluğunu təsdiq edə biliblər. Onlar adanın şimal hissəsinə yaxınlaşa bilib, lakin onu əhatə edən dayaz sular və hava şəraiti səbəbindən sahilə enmək mümkün olmayıb. Buna baxmayaraq, dronlardan gələn görüntülərdə ada aydın şəkildə görünür. Yaxın vaxtlarda alimlər yeni adanın ilkin təsvirini verəcək və onun coğrafi adı ilə bağlı təkliflər irəli sürəcəklər.

Okeanologiya İnstitutu hesab edir ki, Xəzər dənizinin səviyyəsinin daha da azalması ilə bu ada yaxın illərdə öz ərazisini əhəmiyyətli dərəcədə artıra, nadir quş növləri və suitilərinin yuva yeri kimi böyük potensial qazana bilər.