Rusiyanın "əl-qolunu" bağladılar? - Putin İstanbulda Zelenski ilə görüşə məcbur qaldı?

Ukrayna Prezidenti Volodimir Zelenski Rusiya Prezidenti Vladimir Putinə İstanbulda sülh danışıqları ilə bağlı şəxsən görüş təklifi ilə “diplomatik qambit” edib.

Bu fikirlər “The Guardian”da paylaşılıb.

Qeyd edək ki, qambit şahmatda tez hücuma keçmək üçün piyadanı qurban verməyə deyilir.

V.Zelenskinin İstanbulda görüş təklifi təşəbbüsü V.Putindən alıb Kremlə təzyiq kimi yozulur.

Mayın 10-da Böyük Britaniya, Fransa, Almaniya və Polşa liderlərinin Kiyevə səfərində 30 günlük atəşkəs təklifi irəli sürülüb. Hətta Britaniyanın Baş naziri Kir Starmer bildirib ki, V.Putin təklifdən imtina etsə, Rusiyaya qarşı sanksiyalar daha ağır formada tətbiq ediləcək, Ukraynaya isə hərbi yardım artırılacaq.

Avropalılar düşünürlər ki, belə olan halda Rusiya danışıqlar masasına oturmağa məcbur ediləcək. Cavab olaraq isə V.Putin Ukraynanı əvvəlki razılaşmaları pozmaqda günahlandırıb. Amma buna baxmayaraq, V.Putin Kiyev və Kremlin danışıqlar üçün İstanbulda bir araya gəlməyinin mümkünlüyünü dilə gətirib.

Avropalıların fikrincə, Rusiya liderinin belə danışması Donald Tramp Administrasiyasına Moskvanın konstruktiv olduğunu nümayiş etdirməkdən başqa bir şey deyil. Çünki V.Putin V.Zelenskinin təkbətək görüş təklifinə müsbət cavab verməyə bilər. Rusiya lideri belə spontan danışıqlara hazır deyil.

Hər halda hazırda çıxış yolu İstanbuldadır. Rusiya danışıqlara qatılsa, Qərbin tələb etdiyi 30 günlük atəşkəs razılaşması əldə oluna bilər. Moskvanın görüşdən imtinası isə Rusiyanın Avropa və ABŞ-nin yeni sanksiyaları ilə üzləşməsi ilə nəticələnəcək.