Rusiyaya müharibə lazımdır, ona görə də... | Zelenskidən Putinə açıq mesaj

Ukrayna Prezidenti Volodimir Zelenski rusiyalı həmkarı Vladimir Putinin 3 ildir sürən müharibəni davam etdirmək istədiyini, lakin onun bunu birbaşa ABŞ Prezidenti Donald Trampa açıqlamaqdan çəkindiyini söyləyib.

O, Putinin 30 günlük atəşkəs təklifi ilə bağlı çıxışına cavab verib.

“İndi biz hamımız Rusiyadan cəbhədəki sükut ideyasına cavab olaraq Putinin çox gözlənilən, çox manipulyativ sözlərini eşitdik. O, faktiki olaraq hazırda imtina hazırlayır. Putin sözsüz ki, birbaşa Trampa bu müharibəni davam etdirmək, ukraynalıları öldürmək istədiyini deməkdən çəkinir. Buna görə də onlar Moskvada sükut ideyasını elə ilkin şərtlərlə əhatə edirlər ki, ümumiyyətlə heç nə alınmasın və ya mümkün qədər uzun müddət alınmasın”, – deyə dövlət başçısı vurğulayıb.

O, Kiyevin prosesi çətinləşdirmədiyinə, Moskvanın isə dağıdıcı mövqe nümayiş etdirdiyinə diqqət çəkib.

“Biz hər hansı bir şeyi mürəkkəbləşdirən şərtlər qoymuruq, bunu Rusiya edir. Həmişə dediyimiz kimi, hər şeyi uzadacaq, destruktiv olacaq yeganə tərəf Rusiyadır. Onlara müharibə lazımdır. İndi Putinə təzyiq göstərmək lazımdır. Sanksiyalar tətbiq etmək lazımdır. Rusiyanı müharibəni bitirməyə məcbur etmək üçün amerikalı, avropalı tərəfdaşlarımızla, dünyada sülh istəyən hər kəslə işləyəcəyik”, – deyə Ukrayna Prezidenti çağırış edib.