Saakaşvili sirləri açdı | Trampla arasındakı dialoq müzakirələrə səbəb oldu

Gürcüstanın sabiq prezidenti Mixeil Saakaşvili Donald Trampın ABŞ prezidentliyinə namizədliyi ilə bağlı onun fikrini necə soruşduğu barədə sosial şəbəkə hesabında yazıb.

"2013-cü ildə, artıq prezidentliyimdən sonra mən Nyu-Yorkda idim. Maykl Koen mənə zəng edərək Donald Trampın danışmaq istədiyini dedi və telefonu ona verdi. O soruşdu ki, hardasan? Dedim Nyu-Yorkdayam, istəyirsənsə, gəl, görüşək. O mənə söz verdi ki, Uilyamsburqda məni ziyarət edəcək.

Yeri gəlmişkən, məndən soruşdu ki, Mişa, mənim yenidən prezidentliyə namizədliyimi irəli sürməyim haqda nə düşünürsən? Cavab verdim: "Siz mənim bu məsələ ilə bağlı fikrimi bilirsiniz, biz artıq dəfələrlə danışmışıq, hesab edirəm ki, sizin çox yaxşı şansınız var". Cavab verdi: "Bildiyimə görə, ətrafımda heç kim şansım olduğuna inanmır".

Mən onu ruhlandırdım və dedim: "Onlara inanma". Sonra o, Maykla dedi, görürsən, mən sənə dedim, Mişa da deyir ki, mənim şansım var", – Mixeil Saakaşvili vurğulayıb.

Qeyd edək ki, D.Tramp 2016-cı il seçkilərində qalib gəlib, 2020-ci ildə isə uduzub. Ona görə də M.Saakaşvilinin 2013-cü il xatirəsi və D.Trampın “yenidən namizədliyimi irəli sürməyimə necə baxırsan” sualı fikir qarışıqlığı yaradır. Nəzərə almaq lazımdır ki, D.Tramp ilk dəfə 2000-ci ildə prezidentliyə namizədliyini ilkin seçkilərdə irəli sürüb.