Savaş barədə hansı şərt qoyuldu? - Harrislə Netanyahunun gərgin müzakirəsi

İsrail rəhbərliyi Qəzza zolağında atəşkəs və HƏMAS hərbi qruplaşması ilə girovların mübadiləsi planına yeni maddələr əlavə etmək niyyətindədir.

Xarici medianın yaydığı məlumata görə, iyulun əvvəlində Qahirədə keçirilən danışıqlarda Təl-Əviv rəsmiləri mülki şəxslərin Qəzza zolağının cənubundan şimalına gedərkən yoxlamalardan keçməli olduqlarına dair şərt irəli sürüb. Lakin çox keçmədən HƏMAS bu təklifi rədd edib.

Bundan əlavə, İsrail tərəfi Qəzza ilə Misir arasındakı sərhədə ordusunun nəzarət etməsini də istəyib.

Bütün bu baş verən hadisələrin fonunda isə İsrailin Baş naziri Benyamin Netanyahu ardıcıl olaraq ABŞ Prezidenti Cozef Bayden və vitse-prezident Kamala Harris ilə görüşüb. Kamala Harris Qəzzada müharibəyə son qoymağın vaxtının yetişdiyini bildirib:

"Mən Baş nazirə Qəzzada insanların çəkdiyi zülm və çoxlu sayda günahsız mülki şəxsin ölümü ilə bağlı ciddi narahatlığımı bildirdim və oradakı ağır humanitar vəziyyətə dair mövqeyimi də açıq şəkildə ortaya qoydum. 2 milyondan çox insan dəhşətli dərəcədə qida çatışmazlığı ilə üzləşib.

Son 9 ay ərzində Qəzzada baş verənlər ürəkağrıdıcıdır. Biz bu faciələri görməzdən gələ bilmərik və mən baş verənlərin qarşısında susmayacağam. Gəlin müharibəyə son qoymaq üçün atəşkəsin əldə edilməsinə nail olaq. Girovları evlərinə göndərək və Fələstin xalqını lazımi yardımla təmin edək. Onu da deyim ki, mən 2 dövlətli sülhün tərəfdarı olmağa davam edəcəyəm".