Savaş onların işinə yaradı | İsrail-İran münaqişəsi dünyaya necə təsir edəcək?

Hazırda dünyanın diqqəti İsrail-İran münaqişəsinə yönəlib. Bu savaşdan müxtəlif formada həm xeyirli çıxan, həm də zərər görən qüvvələr var.

İran-İsrail savaşı başlayarkən ağla ilk gələn Rusiya-Ukrayna cəbhəsi oldu. Baş vermiş bu savaş dünyanın diqqətini bu istiqamətdən yayındırdı ki, bu da Moskvanın işinə yarayır.

Yaxın Şərqdə barışıq əldə olunmasa, ABŞ-nin İsrailə əhəmiyyətli dəstək verəcəyi gözlənilir. Bu isə Ukrayna üçün ciddi problem yarada bilər. Çünki Vaşinqtonun hərbi yardımları İsrailə yönələcək.

İsbat kimi Pentaqonun Ukrayna üçün nəzərdə tutulan PUA ilə mübarizə texnologiyalarını İsrailə yerləşdirməsini göstərmək olar. Moskva isə vəziyyətdən istifadə edərək Ukraynaya təzyiqi artırıb. Kiyev və Odessaya son hücumlar bunun təsdiqidir.

Yaxın Şərqdəki gərginlik Çinin də işinə yarayır. Çünki Vaşinqtonun diqqəti İrana yönəltməsi Çinin Tayvana siyasi təzyiq etməsinə şərait yaradır. İqtisadi tərəfdən isə Çinə çox zərər dəyəcək.

"Şərq-Qərb Nəqliyyat dəhlizi", həmçinin Pekinin Avropa bazarına çıxşını təmin edən digər layihələrdə axsamalar olacaq. Münaqişə İran və İsraillə bərabər region ölkələrində də ciddi problemlər yarada bilər. İsrail münaqişəni uzadıb müttəfiqlərini də döyüşlərə qoşa bilsə, İranla qonşu ölkələr qaçqın axını ilə üzləşəcək.

Savaşın uzanması həmçinin enerji bazarında qiymətlərin artmasına gətirib çıxaracaq ki, bu da Avropaya və İrandan neft alan Hindistana sərf etmir.