Sevilməyən Makronun yeganə təsəllisi görün nədir

Fransa əhalisinin dörddəüçü Emmanuel Makronun prezident postunda son 8 illik fəaliyyətini mənfi qiymətləndirir və onun 2032-ci ildə Yelisey sarayına qayıtmasını istəmir.

Bu, “Le Figaro” qəzetinin sifarişi ilə “Odoxa-Backbone Consulting” şirkəti tərəfindən keçirilmiş ictimai rəy sorğusunun nəticələrindən bəlli olub.

Sorğunun nəticələrinə görə, min fransızın 71 %-i E.Makronun Yeliseydəki 8 illik rekord fəaliyyətini mənfi qiymətləndirib. Beləliklə, dövlət başçısına qarşı cəmiyyətdə etimadsızlıq 2022-ci ilin martından – onun ikinci müddətə seçildiyi vaxtdan bəri 19 faiz bəndi artıb.

Bildirilir ki, mənfi reaksiyanın bu səviyyədə olmasına səbəb parlamentdə qəbul edilmiş pensiya islahatıdır. Bundan başqa, 2024-cü ilin yayında cəmiyyət tərəfindən “rədd edilən və başa düşülməyən” hökumətin buraxılması bunu təhrik edib.

E.Makron üçün hazırda bir təsəlli var. O da sələfi Fransua Ollandın reytinq səviyyəsinə hələ düşməməsidir. Bu rəqəm F.Ollandda 73 % təşkil edib.

Qəzet qeyd edib ki, Fransa Prezidentinin mayın 13-də TF1 telekanalında verdiyi 3 saatlıq müsahibə belə tərəzinin gözünü öz xeyrinə əyməyə kömək etməyib. Üstəlik, E.Makron müsahibənin sonunda 2032-ci ildəki növbəti seçkilər barədə hələ düşünmədiyini bildirsə də, sorğuda iştirak edənlərin 84 %-i onu namizədlər arasında görmək istəmədiklərini bildiriblər.