Şimali Koreyadan ABŞ-yə açıq mesaj | Danışıqlar bu halda olacaq!

“Əgər Vaşinqton Şimali Koreyanın nüvə silahlarından imtina etməsində israr etməkdən əl çəkərsə, ABŞ ilə dialoqun aparılmasına mane olacaq heç bir səbəb yoxdur”.

Bu fikirləri Şimali Koreya lideri Kim Çen In səsləndirib. Bildirib ki, o, sanksiyalardan azad olmaq naminə heç vaxt nüvə arsenalından imtina etməyəcək.

Kim Çen In Ali Xalq Məclisində çıxışı zamanı bildirib ki, ABŞ və Cənubi Koreyadan gələn ciddi təhlükələrə qarşı ölkənin təhlükəsizliyini təmin etmək üçün nüvə silahları əldə etmək Şimali Koreya üçün ölüm-dirim məsələsidir.

Kim Çen In müttəfiqlərin keçirdiyi bir sıra müntəzəm hərbi təlimləri sadalayaraq nüvə müharibəsinə hazırlıq işləri aparıldığını da deyib.

Kim əlavə edib ki, Vaşinqton və Seulun dialoq təklifləri səmimi deyil, çünki onların əsas məqsədi Şimali Koreyanı zəiflətmək və mövcud rejimi məhv etmək olaraq qalır. Onun sözlərinə görə, Şimali Koreyanın nüvə proqramının mərhələli şəkildə ləğv edilməsinə dair Seulun təklifi bunun sübutudur.

Bu açıqlamalar Seuldakı yeni liberal hökumətin ABŞ Prezidenti Donald Trampı Kim Çen Inla dialoqa səslədiyi vaxta təsadüf edir.

Xatırladaq ki, sanksiya və nüvədən imtina məsələlərində yaranan fikir ayrılığına görə 2019-cu ildə Vaşinqton-Pxenyan danışıqları dayandırılıb.