Simonyan Azərbaycanla Ermənistan arasındakı sülh prosesindən danışdı

“Azərbaycanın öz yaraları var. Onlar deyirlər ki, Ermənistan 20 faiz torpaqlarımızı 30 il işğalda saxlayıb. Buna görə də Azərbaycan üçün 50, hətta 100 il sonra yarana biləcək istənilən təhlükənin qarşısını indidən almaq vacibdir”.

Bu sözləri Ermənistan parlamentinin spikeri Alen Simonyan jurnalistlərə açıqlamasında deyib.

Onun sözlərinə görə, ermənilər azərbaycanlı sərhədçiləri görmək istəməsələr də, zamanla bu da olacaq.

“Ermənilərlə azərbaycanlılar Moskvada dostluq edir, birgə bizneslə məşğuldurlar. Rusiyadan başqa ölkələrdə də hər iki millətin nümayəndələri arasında mehriban münasibətlər mövcuddur.

Razıyam ki, bizim yaralar təzədir və hələ üstü qapanmayıb. Amma Azərbaycan tərəfi də itkilər verib. Məgər biz azərbaycanlı öldürməmişik?!” deyən A.Simonyan bildirib ki, bütün bunları nəzərə alaraq etimadın bərpası zamanı təmaslar minimuma endiriləcək. Lakin 5-10 il sonra buna ehtiyac qalmayacaq.

Parlamentin spikeri bildirib ki, “emosional mübahisələr tez həll ediləcək” və hazırda Ermənistan üçün kommunikasiyaların açılması daha önəmli məsələdir.

“Tramp marşrutu” haqqında danışan Alen Simonyan bəzi müxalifət provokasiyalarına da cavab vermiş olub.

O bildirib ki, “Tramp marşrutu”nu Zvartnots aeroportunun Argentina şirkəti tərəfindən idarə olunması ilə müqayisə etmək olar.

“Belə deyək, enerji infrastrukturu erməni şirkəti tərəfindən inşa oluna, dəmir yolunun salınması isə xarici şirkətin öhdəliyində qala bilər” deyən A.Simonyan bildirib ki, hər şey 5 prinsip əsasında reallaşdırılacaq.