Türkmənistanda "Beynəlxalq Sülh və Etimad Forumu" keçirilib - Baku TV

Türkmənistan ölkənin neytrallıq statusu qazanmasının 30 illiyini qeyd edir.

Bu münasibətlə paytaxt Aşqabadda Beynəlxalq Sülh və Etimad Forumu keçirilib.

Forumda dünyanın bir sıra ölkələrinin dövlət və hökumət başçıları iştirak ediblər. Mötəbər tədbirdə iştirak edən Baş nazir Əli Əsədov çıxışı zamanı bildirib ki, Azərbaycan Türkmənistanın neytrallıq siyasətini yüksək qiymətləndirir:

“Azərbaycan və Türkmənistan arasında dostluq və qardaşlıq münasibətləri mövcuddur. Azərbaycan neytrallıqla bağlı Türkmənistan tərəfindən BMT-də irəli sürülən qətnamələri daim dəstəkləyib və “Beynəlxalq sülh və etimad ili – 2025” qətnaməsinə həmmüəllif qismində qoşulub.

Biz qardaş Türkmənistanın bu təşəbbüslərini qlobal sülh və təhlükəsizlik arxitekturasına mühüm töhfə kimi qiymətləndiririk. Azərbaycan Türkmənistanın BMT himayəsi altında Neytrallıq Universitetinin yaradılması ilə bağlı təşəbbüsünü yüksək qiymətləndirir və Universitetin işində fəal iştirak etməyə hazırlığını ifadə edir”.

Qeyd edək ki, Aşqabad şəhərində işgüzar səfərdə olan Azərbaycanın Baş naziri Əli Əsədov ölkəmizin Türkmənistandakı səfirliyinə gələrək Ümummilli Lider Heydər Əliyevin buradakı büstü önünə gül dəstəsi qoyub. Baş nazir Ulu Öndərin xatirəsini ehtiramla yad edib.