Şinzo Abenin istifadə etdiyi qolf çubuğu Trampa hədiyyə olunub

Yaponiyanın Baş naziri Sanae Takaiçi və ABŞ Prezidenti Donald Tramp iki ölkə arasında “yeni qızıl müttəfiqlik dövrü” haqqında müqavilələr, eləcə də vacib minerallar sahəsində əməkdaşlıq haqqında memorandum imzalayıb. Takaiçi və Tramp arasında danışıqlar oktyabrın 28-də Tokioda aparılıb.

Takaiçi üçün bu onun 21 oktyabrda vəzifəyə başlamasından bəri Ağ Evin hazırkı Prezidenti ilə ilk danışıqları idi. Donald Tramp üçün isə bu onun ikinci prezidentlik müddətində Yaponiyaya ilk səfəridir. ABŞ Prezidenti Yaponiyaya 4 dəfə, sonuncu dəfə 2019-cu ildə səfər edib.

Tramp görüşün əvvəlində bildirib ki, Vaşinqton Tokiodan böyük silah sifarişi alıb və ümid edir ki, 2 ölkə arasında ticarət dövriyyəsi daha çox olacaq. Trampın Yaponiya səfərindən az sonra Tokionun onu “Nobel” sülh mükafatına təqdim edəcəyinə dair məlumat yayılıb.

Bundan başqa, Yaponiyanın yeni Baş naziri Donald Trampı öz hədiyyələri ilə təəccübləndirib. Takaiçi Trampa ölkənin mərhum baş naziri Şinzo Abenin istifadə etdiyi qolf çubuğunu hədiyyə edib.

Təqdim olunan hədiyyələr arasında qızıl yarpaqla bəzədilmiş qolf topu və yapon çempionu Hideki Matsuyamanın imzaladığı qolf çantası da olub.