Süni intellektin yüksəlişi enerji bazarını necə dəyişəcək?

Süni intellektə artan tələbat dünya üzrə məlumat mərkəzlərinə yatırımları sürətləndirir. 

Hesablamalara görə, 2026-2050-ci illər ərzində bu sahəyə ümumilikdə 31,6 trilyon dollar investisiya qoyula bilər.

Hesabatda bildirilir ki, bu il məlumat mərkəzlərinə yatırımların həcmi təxminən 800 milyard dollar təşkil edəcək. Göstəricinin 2030-cu ildə illik 1,1 trilyon dollara, 2050-ci ildə isə 1,8 trilyon dollara çatacağı gözlənilir.

Bu nəhəng investisiyaların reallaşmasında əsas amillərdən biri elektrik enerjisi olacaq. Süni intellektin inkişafı mövcud elektrik şəbəkələrinə təzyiqi artırır və məlumat mərkəzlərinin enerji ilə sürətli və etibarlı təminatı getdikcə daha böyük əhəmiyyət daşıyır.

Xüsusilə ötürmə gücü, yarımstansiyalara çıxış və transformatorların təchizat müddətinin yeni layihələrin qarşısında əsas maneələrdən olduğu bildirilir.

Bəzi məlumat mərkəzi operatorları artıq öz elektrik enerjisi istehsal güclərini yaratmağa başlayıb. Lakin hesabatda bunun genişmiqyaslı inkişaf üçün tələb olunan şəbəkə investisiyalarını əvəz edə bilməyəcəyi vurğulanır.

Süni intellekt iş yüklərində istifadə olunan qrafik emal vahidləri və digər sürətləndiricilər ənənəvi sistemlərlə müqayisədə daha çox enerji sərf edir. Serverlər və bu avadanlıqların adətən 4-6 ildən bir yenilənməsi isə investisiya ehtiyacını daha da artırır.