Təhlükəsizlik narahatlığı ABŞ-İsrail münasibətlərini yenidən gündəmə gətirdi - Baku TV

Pentaqon İsrailin Amerika Birləşmiş Ştatlarına qarşı kəşfiyyat fəaliyyətinin güclənməsindən narahatdır.

Bu barədə “NBC News” mənbələrə istinadən məlumat yayıb.

Onların sözlərinə görə, son həftələrdə ABŞ Müdafiə Nazirliyinin Kəşfiyyat İdarəsi İranla müharibədə atılacaq növbəti addımlarla bağlı İsrail və ABŞ arasında artan fikir ayrılıqları fonunda əks-kəşfiyyat təhdidinin yeni qiymətləndirilməsini hazırlayıb. Bununla da İsrail tərəfindən gələn təhdid səviyyəsi kritik kateqoriyaya qaldırılıb.

Mənbələrin iddiasına görə, bu qərar Pentaqonun İsrailin ABŞ Prezidenti Donald Tramp Administrasiyasında Yaxın Şərq münaqişələri ilə bağlı daxili müzakirələr və qərar qəbul etmə prosesi haqqında məlumat əldə etmək üçün yüksəkvəzifəli ABŞ məmurlarını müşahidə etməyə xüsusi səylər göstərdiyi ilə bağlı narahatlıqları ilə əlaqədardır.

Mənbələrdən biri qeyd edib ki, Müdafiə Nazirliyinin Kəşfiyyat İdarəsinin qiymətləndirməsinə 7 səhifəlik sənəd və analitik cədvəl daxildir. Sənəddə ABŞ tərəfinin narahatlığını artıran bir sıra konkret insidentlər sadalanıb.

Vaşinqtondakı İsrail səfirliyi isə bu ittihamları qəti şəkildə rədd edib.

"İsrailin ABŞ-yə qarşı casusluq etdiyini iddia etmək tamamilə yanlışdır. İsrail ABŞ strukturları, xüsusilə də bu ölkənin hökumət nümayəndələri haqqında kəşfiyyat məlumatları toplamır", – deyə səfirlikdən bildirilib.