Tehran Vaşinqtonu beynəlxalq hüququ tapdalamaqda açıq şəkildə ittiham etdi - Baku TV

İran Xarici İşlər Nazirliyi ABŞ-nin ölkənin cənubundakı sahil nəzarəti obyektlərinə endirdiyi hava zərbələrini kəskin pisləyib.

Rəsmi Tehran bu addımı BMT Nizamnaməsinin və iyunun 18-də imzalanmış müharibənin dayandırılması haqqında memorandumun pozulması kimi qiymətləndirib.

Nazirlik eyni zamanda İsrailin Livana paralel hücumlarının da həmin razılaşmaya zidd olduğunu bildirib.

Bəyanatda qeyd olunub ki, İran öz suverenliyini qorumaq üçün qanuni özünümüdafiə hüququndan istifadə edir və İran Silahlı Qüvvələrinin ABŞ ilə əlaqəli hədəflərə endirdiyi zərbələr də bu çərçivədə həyata keçirilib.

Xarici İşlər Nazirliyi ABŞ və onunla əməkdaşlıq edən tərəflərin baş verən hadisələrin nəticələrinə görə məsuliyyət daşıdığını vurğulayıb.

Eyni zamanda İran Fars körfəzinin cənub sahilində yerləşən ölkələri öz ərazilərinin İrana qarşı istifadə olunmasına imkan verməməyə çağırıb.

Nazirlik BMT-ni, Təhlükəsizlik Şurasını və digər beynəlxalq qurumları ABŞ-nin addımlarına hüquqi qiymət verməyə və müvafiq tədbirlər görməyə dəvət edib.