Tehrandan İrəvana sərt xəbərdarlıq | münasibətlər gərginləşir?

Bir müddətdir Ermənistanın İranla münasibətlərində gərginlik müşahidə edilir.

Buna səbəb isə Avropa İttifaqının Ermənistandakı müşahidə missiyasının fəaliyyətidir. Rusiyadan sonra rəsmi Tehran da sözügedən missiyanın Ermənistan sərhədində müşahidə aparmasından narahatlığını ifadə etməyə başlayıb. Hətta Münxen Konfransından sonra Nikol Paşinyan erməni icmaları ilə görüşdə etiraf edib ki, İranla müttəfiq olsalar da, Ermənistanın Qərblə yaxşı münasibətdə olması Tehranda xoş qarşılanmır.

Çünki N.Paşinyanın müavini Mqer Qriqoryanın başçılıq etdiyi nümayəndə heyətinin İrana sonuncu səfəri ürəkaçan notlarla bitməyib. İran Prezidenti İbrahim Rəisi regionda kənar aktorların olmasına imkan verməyəcəklərini bildirərək İrəvana xəbərdarlıq edib.

Məsələ ilə bağlı Baku TV-yə açıqlama verən politoloq Elxan Şahinoğlu bildirib ki, Ermənistan rəsmiləri anlamağa başlayırlar ki, sərhəddə yerləşən Aİ missiyasının sayının artması İran-Ermənistan münasibətlərinə mənfi təsir edə bilər:

“N.Paşinyanın bununla bağlı açıqlamaları var. N.Paşinyan indi çıxılmaz vəziyyətdədir. İki-üç stulda eyni zamanda oturmaq mümkün deyil. Gərək seçim etsin, seçim də edə bilmir. İranla yaxşı əlaqələrinin olmağını, Rusiya ilə də münasibətlərini davam etdirmək istəyir. Amma Qərbin təhlükəsizlik institutları ilə sıx əməkdaşlıq edir ki, bu da Rusiya ilə İranın regional maraqlarına ziddir”.