Tehranın mesajı dəniz yollarının gələcəyinə hansı təsiri göstərə bilər? - Baku TV

İranın Hörmüz boğazı ilə bağlı mövqe və şərtləri vasitəçi kimi Pakistana elan edilib.

Bunu məlumatlı mənbə "Tasnim"ə açıqlayıb.

"İrana səfər edən Pakistan Ordusunun komandanı Asim Munir Amerika tərəfindən təhdid və ya buna bənzər mesaj gətirməyib, əksinə, o, danışıqlar mühitini açmaq istəyir", – deyə mənbə bildirib.

O əlavə edib ki, Munirlə keçirilən görüşlərdə İranın mövqeləri Pakistan tərəfinə şəffaf şəkildə elan edilib:

"Amerikanın İslamabad Anlaşma Memorandumuna qayıtması və onun 5-ci bəndini, yəni Hörmüz boğazı üzərində İranın tənzimləmələrini ehtiva edən müddəalarının icrası İranın şərtlərinə daxildir. Bu məsələ Pakistana elan edilib. Pakistan tərəfi bunu Amerika tərəfinə çatdırmağa çalışır".

Xatırladaq ki, Qətərin Xarici İşlər Nazirliyinin rəsmi nümayəndəsi Məcid əl-Ənsari ABŞ və İran danışıqlarında heç bir yeniliyin olmadığını bildirib.

"ABŞ-nin Yaxın Şərqdə gələcəyi olmayacaq və region ölkələri öz müqəddəratlarını xarici müdaxilə olmadan müəyyənləşdirəcəklər". Bunu isə İranın Ali liderinin hərbi müşaviri Möhsün Rzayi deyib.

Onun sözlərinə görə, ABŞ-nin bütün regionun, xüsusən də İraqın gələcəyində yeri yoxdur.

O həmçinin əlavə edib ki, regional ölkələr də ABŞ-nin iştirakı olmadan öz talelərini müəyyən edəcəklər.