Ticarət “atəşkəs”i belə gərginliyi azaltmayıb | ABŞ-nin neft şirkətlərinə gözlənilməz xəbər

ABŞ Statistika Bürosunun hesabatına görə, Çin may ayından bir barel belə Amerika nefti almayıb.

2018-ci ildən bəri ilk dəfədir ki, dünyanın ən böyük neft idxalçısı üçüncü aydır Amerika şirkətlərindən neft tədarük etmir.

Boşluq Vaşinqton və Pekin arasında davam edən ticarət gərginliyi fonunda yaranıb və ABŞ-nin ümumi xam neft ixracını son iki ildən çox müddətdə ən aşağı səviyyəyə çatdırıb. ABŞ nefti Çin üçün elə də əhəmiyyət kəsb etmir. Çünki Çin rahatlıqla digər təchizatçılardan xam neft alır.

“Bloomberg” qeyd edir ki, Çinin alışları dayandırması isə Amerikanın dəniz neft şirkətləri üçün pis xəbərdir. Onlar ilk növbədə ixraca yönəlib, qazma işləri isə WTI neftinin qiyməti bir barel üçün 61 dollardan yuxarı olduğu halda özünü doğruldur.

Qeyd edək ki, WTI fyuçersləri hazırda bir barel üçün 67 dollardan satılır. ABŞ və Çin arasında son ticarət atəşkəsi və tariflərin azaldılmasına baxmayaraq, bu tədbirlər Çinin ABŞ-dən enerji məhsullarının idxalını bərpa etməyə kömək etməyib.