Tramp Baydenin “Kabil səhvi”ni Ukraynada təkrarlayır?

Donald Trampın Ukrayna savaşı ilə bağlı yürütdüyü siyasət sələfi Cozef Baydenin Əfqanıstan müharibəsindəki mövqeyi ilə müqayisə olunur.

“Bloomberg”də yayılan yazıda qeyd olunub ki, ABŞ Ukraynaya qoşun yeritməsə də, Əfqanıstanda olduğu kimi münaqişənin həllinə çalışır. Moskva-Kiyev müharibəsinin nizamlanması isə asan olmadığı üçün böyük məsuliyyət yaradır. Amerikanı yenidən qüdrətli etmək istəyənlər Vaşinqtonun Ukraynadakı savaşa dərin müdaxiləsinə qarşıdır.

“Amma Ukraynaya yardım etmədən Rusiyanın güclənməsinə də şərait yaratmaq olmaz. Çünki belə olan halda Tramp zəif düşər və “Putini dayandırmaq üçün heç nə etmədin” ittihamları ilə üzləşər”, ‒ deyə məqalədə qeyd olunub.

“The Washington Post”un analitiki Mark Tissen yazıb ki, respublikaçılar üçün seçim vaxtıdır:

“Baydenə qarşı Kabil ittihamları kimi siz də Kiyevin süqutunda günahkar olmaq istəmirsinizsə, Ukraynaya hərbi yardım göndərin”.

2025-ci ilin fevralında amerikalı hüquqşünas Maykl Froman bildirib ki, hansısa müqaviləni imzalamağa tələsmək lazım deyil. Çünki bu, Trampın sülhməramlı siyasətini iflasa uğradacaq:

“Taliblərin Kabil küçələrində Amerikanın Hammerlərini sürməsi yaxşı görünmür. Elə isə rusların da Xarkovda “Abrams” tankları ilə hərəkət etdiyini təsəvvür edin”.

Yazıda qeyd olunub ki, Trampın bəzi tərəfdarları onu silah yardımlarından çəkindirməyə çalışır. Məsələn, Stiv Bennon düşünür ki, ABŞ Rusiyanın dərinliklərinə hücum etməyə imkan verən silahları Ukraynaya göndərsə, bu, Trampın savaşına çevriləcək.