Tramp danışıqlarla bağlı İrana xəbərdarlıq etdi - Baku TV

“Tərəflər razılığa gələ bilməsələr, Vaşinqton İrana qarşı hərbi əməliyyatları bərpa etməyə hazırdır”.

Bunu ABŞ Prezidenti Donald Tramp “Fox News” telekanalına müsahibəsində bildirib.

Danışıqların gözləniləndən daha yavaş getdiyini deyən Ağ Ev rəhbəri əlavə edib ki, ABŞ istədiyi nəticələrə tədricən yaxınlaşır, lakin proses vaxt aparır.

Onun fikrincə, tələsmək yaxşı sövdələşmənin ərsəyə gəlməsinə mane ola bilər.

Trampın sözlərinə görə, hazırkı razılaşma layihəsində İranın nüvə silahı hazırlamayacağı və ya heç bir şəkildə əldə etməyəcəyi nəzərdə tutulur.

O qeyd edib ki, İran bununla bağlı üzərinə öhdəlik götürüb. Amerika lideri vurğulayıb ki, bu, tərəflərin yanaşmasında əhəmiyyətli dəyişiklikdir.

Tramp həmçinin diqqətə çatdırıb ki, potensial sazişə razılaşma imzalandıqdan dərhal sonra Hörmüz boğazının açılması da daxil ola bilər.

ABŞ Prezidenti sonda İranla razılaşma əldə olunmayacağı təqdirdə hərbi variantın gündəmdə qalacağını bildirib.