Tramp dediklərini bir-bir həyata keçirir | Siyahıda daha hansı qurumlar var?

ABŞ Ümumdünya Səhiyyə Təşkilatından çıxacağını açıqlayıb. Buna səbəb olaraq isə Çində başlayan COVID-19 pandemiyasına və digər qlobal sağlamlıq böhranlarına qarşı qurumun düzgün davranmaması, o cümlədən təcili islahatların aparılmaması göstərilib.

Yerli medianın məlumatına görə, ABŞ səhiyyə təşkilatını 2026-cı ilin yanvarın 22-də tərk edəcək.

Bildirək ki, Tramp administrasiyasının gəlişi elə bu vədlərlə başlayıb. ABŞ lideri BMT, Ümumdünya Səhiyyə Təşkilatı da daxil olmaqla bir sıra qurumların maliyyələşdirilməsini dayandıracağını və onları tərk edəcəyini bəyan etmişdi.

2025-ci ilin fevralın 4-də qəbul edilən və Ağ Evin saytında dərc olunan qərara əsasən, BMT-nin qolları olan UNESCO və qurumun Yaxın Şərqdəki Fələstinli Qaçqınlara Yardım və İşlər üzrə Agentliyi də Vaşinqtonun radarına düşənlər siyahısındadır. Hələlik rəsmi olaraq təşkilatdan ayrılmasalar da, Donald Trampın qərarı ilə sözügedən qurumların fəaliyyəti nəzərdən keçirilir.