Tramp Putinlə görüşünün bəzi detallarını açıqladı | ABŞ Prezidenti Ukraynaya icazə verdi

ABŞ Prezidenti Donald Tramp Ukrayna münaqişəsinin sülh yolu ilə nizamlanmasına nail olmaq üçün Rusiya Prezidenti Vladimir Putinlə Alyaskada görüş zamanı Rusiya və Ukrayna arasında ərazilərin mübadiləsi məsələsini müzakirə etmək niyyətində olduğunu deyib.

O həmçinin bu məsələ ilə bağlı yekun qərarın Moskva və Kiyevə aid olduğunu bildirib.

“Bəli, ərazi mübadiləsi müzakirə olunacaq, lakin mən Ukraynaya qərar vermək imkanı verəcəyəm, inanıram ki, onlar düzgün qərar verəcəklər. Mənim məqsədim Ukrayna üçün danışıqlar aparmaq deyil, onları danışıqlar masası arxasında əyləşdirməkdir”, – deyə D.Tramp bildirib.

Donald Tramp ABŞ-nin Avropa ölkələri ilə birlikdə Ukraynaya təhlükəsizlik zəmanəti verə biləcəyini, lakin bunun NATO-ya qoşulmaq variantında olmayacağını bildirib.

“Ehtimal var ki, Avropa və digər ölkələrlə belə bir şey edə bilək. Amma NATO formatında yox. Çünki bilirsiniz ki, bəzi şeylər baş verməyəcək”, – deyə D.Tramp qeyd edib.

ABŞ lideri məsələ ilə bağlı əlavə şərh verməyib. D.Tramp Rusiyanın ABŞ-nin iqtisadi potensialına maraq göstərdiyini bildirib:

“Fərqinə vardım ki, V.Putin Rusiyadan çoxlu biznesmen gətirir. Bu, yaxşıdır. Bu mənim xoşuma gəlir, çünki onlar bizneslə məşğul olmaq istəyirlər. Amma biz müharibəni həll etməyincə onlar bizneslə məşğul olmayacaqlar”.

ABŞ Prezidenti Alyaskada keçiriləcək sammitin nəticəsiz qalacağı təqdirdə Rusiyanı ağır iqtisadi sanksiyalarla hədələyib.

“V.Putin düşünür ki, Ukraynadakı müharibə ona kömək edir, amma əslində bu ona ziyan vurur”, – deyə ABŞ Prezidenti əlavə edib.

O həmçinin V.Putini “ağıllı” adlandırıb. D.Tramp Alyaska sammitindən “nəsə çıxacağını” da istisna etməyib.