Tramp Starmerlə görüşdə Zelenski ilə bağlı dediklərini təkzib etdi

ABŞ Prezidenti Donald Trampa Böyük Britaniyanın Baş naziri Kir Starmerlə görüşdə Ukrayna lideri Volodimir Zelenskini hələ də diktator hesab edib-etməməsi ilə bağlı sual verilib.

Ağ Ev rəhbəri isə əvvəlki ifadələrini təkzib edib, suala sualla cavab verib: “Mən bunu demişəm?”.

Baxmayaraq ki, müvafiq mətni olan yazı hələ də Trampın “Truth” sosial şəbəkəsindəki səhifəsindən silinməyib.

Qeyd edək ki, fevralın 19-da Donald Tramp öz səhifəsində Zelenskini kəskin tənqid edib və onu seçki keçirmək istəməyən diktator adlandırıb.

Bu arada, Donald Tramp Rusiyanın Ukraynada müharibənin başa çatmasına reaksiyasını yüksək qiymətləndirib və bu məsələdə irəliləyiş olduğunu qeyd edib.

Tramp Rusiyanın potensial sülh sazişlərini pozmayacağına əminliyini ifadə edib.

“Düşünürəm ki, biz müsbət irəliləyiş əldə etmişik və Rusiya çox yaxşı işləyir”, ‒ deyə Ağ Ev rəhbəri əlavə edib.