Tramp ”tarif atəşi”nə tutduğu Pekinlə belə yaxınlaşır | ABŞ-Çin müqaviləsinin detalları

ABŞ ilə Çin arasında nadir metallarla bağlı razılıq əldə olunub.

“Reuters”də yayılan məlumata görə, sənəd nadir metalların ABŞ-yə sürətli çatdırılmasını nəzərdə tutur. Digər məqamlar açıqlanmır.

İmzalanan saziş ABŞ Prezidenti Donald Trampın Çinə tətbiq etdiyi yüksək gömrük rüsumlarının ardından bir növ barışıq jesti kimi də dəyərləndirilə bilər. Əslində, bu addım Çinin özünə də sərf edir. Çünki ABŞ istehsalçılarının Çin bazarlarına çıxış əldə etməsi orada canlanma yaradacaq. Xüsusilə də texnoloji məhsullar, kənd təsərrüfatı, avtomobil sənayesi və enerji sektoru inkişaf edəcək.

Razılaşmanın ən mühüm tərəfi nadir metallarla bağlıdır. D.Trampın hakimiyyətə gəldikdən sonra əsas hədəfi də məhz bu faydalı qazıntılara yiyələnmək olub. Sübut kimi Volodimir Zelenski ilə fevral mübahisəsinə baxmayaraq, nadir metallarla bağlı ABŞ və Ukrayna arasında imzalanan sazişi göstərmək olar.

Dünyada ən çox nadir metallar isə Çindədir. ABŞ bu metalları əldə etməklə ağıllı telefonlar, hərbi texnika və elektrik avadanlıqlarının istehsalını artıracaq. Bu həm də iki ölkə arasında rəqabətdən ədavətə keçən iqtisadi münasibətləri sahmana sala bilər.

Qeyd edək ki, ən çox nadir metal ehtiyatına malik ikinci ölkə Rusiyadır. Bəziləri düşünür ki, D.Tramp məhz buna görə Moskvaya qarşı sərt sanksiyalar tətbiq etmir. Gələcəkdə Ukrayna və Çinlə imzalanan sazişlərin Rusiya ilə də razılaşdırılacağı gözlənilir.