Tramp Tehrana qarşı nə plan qurur? - Baku TV

Donald Tramp Qətər, Səudiyyə Ərəbistanı və BƏƏ-nin xahişi ilə İrana mayın 19-da zərbə endirmə planlarından imtina edib.

O bu barədə "Truth Social" şəbəkəsində yazıb.

"Qətər Əmiri Təmim bin Həməd Al Tani, Səudiyyə Ərəbistanının vəliəhd şahzadəsi Məhəmməd bin Salman Əl Səud və BƏƏ Prezidenti Məhəmməd bin Zayed Əl Nəhyan mənə müraciət edərək xahiş etdilər ki, mayın 19-na təyin edilmiş İrana qarşı planlaşdırdığımız hərbi hücumu dayandıraq, çünki hazırda ciddi danışıqlar aparılır və böyük liderlər və müttəfiqlər kimi, onların fikrincə, həm ABŞ, həm də bütün Yaxın Şərq ölkələri və onun hüdudlarından kənardakılar üçün tamamilə məqbul olacaq bir razılaşma əldə ediləcək", – deyə Tramp yazıb.

Bununla əlaqədar olaraq, o, ABŞ-nin müdafiə qurumlarına hücumu ləğv etməyi tapşırıb. Amerika liderinin sözlərinə görə, razılaşmaya İranın nüvə silahı hazırlamaqdan imtina etməsi daxil olacaq.

"Lakin mən əlavə olaraq göstəriş verdim ki, məqbul bir razılaşma əldə olunmayacağı təqdirdə, onlar istənilən an İrana qarşı tammiqyaslı, böyük bir hücuma başlamağa hazır olsunlar", – deyə Tramp fikirlərini bu cür yekunlaşdırıb.