Tramp və Zelenski sazişi uyğun bir vaxtda imzalayacaqlar | Metyu Uitaker - Baku TV

ABŞ-nin NATO-dakı daimi nümayəndəsi Metyu Uitaker Ukraynada müharibənin başa çatması və sülhün əldə olunması ilə bağlı danışıb.

Daimi nümayəndə tərəflərin sülhə hər zamankindən daha yaxın olduğunu bildirib. O, danışıqlar prosesini diqqətlə izlədiyini və sülh müqaviləsinin vaxtı çatanda imzalanacağını vurğulayıb.

“ABŞ Prezidenti Donald Tramp və Ukrayna lideri Volodimir Zelenski sülh sazişini uyğun vaxtda imzalayacaqlar. Bununla belə, sənəd imzalanana qədər Ukraynanın özünümüdafiəsi üçün lazım olan bütün silahlarla təmin edilməsi vacibdir. Almaniya, Niderland və Norveç Ukraynaya silah tədarükündə ən böyük töhfə verən ölkələrdir və Vaşinqton sülhə qədər yardımları davam etdirəcək”, – deyə ABŞ-nin NATO-dakı daimi nümayəndəsi bildirib.

Bu arada, Rusiya Prezidentinin mətbuat katibi Dmitri Peskov bildirib ki, Kreml yaxın gələcəkdə Ukrayna münaqişəsinin həlli ilə bağlı yeni danışıqlar raundunun keçiriləcəyini gözləyir, baxmayaraq ki, hələlik dəqiq tarixlər müəyyən edilməyib.

Peskov Ukrayna üzrə növbəti danışıqlar raundunun tarixi ilə bağlı verilən suala cavab olaraq bildirib ki, “xeyr, hələlik konkret tarixlər yoxdur, amma yenə də bunun tezliklə baş verəcəyini gözləyirik”.

Volodimir Zelenski isə daha əvvəl bildirib ki, Ukrayna Əbu-Dabidə keçirilən danışıqlardan sonra növbəti üçtərəfli görüşlərə hazırlaşır.