Trampın müşaviri Ukraynaya məsləhət verdi | Gəlin dürüst danışaq

ABŞ-nin yeni seçilən Prezidenti Donald Trampın baş müşaviri Brayan Lanza bildirib ki, yeni administrasiya Ukraynada Rusiya tərəfindən işğal edilmiş bütün ərazilərin qaytarılmasına deyil, məhz sülhün əldə edilməsinə diqqət yetirəcək.

2016-cı ildən Donald Trampın seçki kampaniyalarında iştirak edən Brayan Lanza Ukraynada müharibə ilə bağlı gələcək administrasiyanın prioritetlərini necə gördüyünü açıqlayıb.

O bildirib ki, prioritet Rusiyanın işğal etdiyi bütün Ukrayna ərazilərinin qaytarılması deyil, onun təbirincə desək, sülh və qırğının dayandırılması olacaq.

“Əgər Volodimir Zelenski danışıqlar masasına gəlib sülhün yalnız Krımın bizdə olması ilə mümkün olduğunu desə, bu bizə onun ciddi olmadığını göstərəcək. Krım artıq əldən gedib”, – deyə Brayan Lanza bildirib.

Eyni zamanda o, şir ürəkli Ukrayna xalqına dərin hörmət bəslədiyini də vurğulayıb.

“Biz Ukraynaya deyəcəyik. Bilirsiniz nə görürsünüz? Siz sülhün realist görüntüsünü görürsünüz. Bu, qələbə görüntüsü deyil, bu, sülh görüntüsüdür. Gəlin, dürüst danışaq, – deyə B.Lanza əlavə edib.