Trampın prezident seçilməsinin əsas səbəbi | Yenidən olsa nələr dəyişəcək?

“Donald Trampın reytinqi yüksəkdir. Amerikalı ekspertlərin fikrincə, Respublikaçılar Partiyasının prezidentliyə namizədi Donald Tramp olacaq. Bu baş verərsə, ABŞ-nin tarixində ilklərlə yadda qalacaq.

Birincisi, ABŞ-də prezidentlər adətən konqresmenlər və ştatların qubernatorları olur. İş adamı olan D.Tramp nə konqresmen, nə də qubernator olub. Buna baxmayaraq, o, populyarlığı hesabına 2016-cı ildə ölkəsinin prezidenti seçildi”.

Bu sözləri politoloq Elxan Şahinoğlu deyib. O bildirib ki, Donald Tramp yenə prezident seçilərsə, bu, ABŞ tarixində başqa bir ilk olacaq:

“ABŞ-də prezident seçkisində məğlub olan şəxs adətən sonradan prezidentliyə namizəd olmur. D.Tramp isə ötən seçkidə məğlubiyyətinə rəğmən, yenidən Ağ Evə qayıtmaq istəyir və onun yüksək reytinqi buna şərait yaradır.

D.Tramp yenə eyni vədlər verir, “mühacirləri ölkələrinə göndərəcəyəm”, “sərhədləri gəlmələr üçün qapadacağam”, “Ukraynaya hərbi və maliyyə dəstəyini dayandırıb Rusiya-Ukrayna müharibəsinə son qoyacağam”.

“The Washington Post” qəzetinin yazdığına görə, D.Tramp prezident seçildiyi halda Çinə qarşı ticarət müharibəsinə də başlayacaq. Məqalədə D.Trampın Çinə qarşı yeni planının olduğu yazılıb. Bu, qlobal ticarət müharibəsinə səbəb ola bilər.

D.Tramp öz müşavirləri ilə Çin məhsullarına 60 faizlik gömrük rüsumunun tətbiqini müzakirə edib. Bundan başqa, D.Tramp Çinlə ticarət əlaqələrinin statusunu azaltmağa çalışacaq.

D.Tramp prezident seçilərsə, vədlərini yerinə yetirəcəkmi? D.Tramp bu mənada digərlərindən fərqlidir. O, ötən dəfə də prezident seçilən kimi ilk gündən vədlərini yerinə yetirməyə başladı. Ona görə də D.Trampın Çinlə bağlı söylədikləri sadəcə vəd deyil, onun Ağ Evə sahib olacağı halda Vaşinqtonun Pekinlə münasibətlərinin gərginləşəcəyini ehtimal etmək olar.

2023-cü ilin noyabr ayı üçün Çin ABŞ-nin xarici ticarətində Meksika və Kanadadan sonra üçüncü sırada qərar tutub. D.Tramp prezident seçiləcəyi halda Çin ABŞ-nin xarici ticarətində yerini başqasına təhvil verəcək”.