Trampın qərarı Texasda xalqı ayağa qaldırdı | Etirazlar ölkəni silkələdi

Amerika Birləşmiş Ştatlarının Texas ştatının Dallas şəhərində yenidən etirazlar baş qaldırıb.

Bu dəfə yerli sakinlər də Donald Trampın miqrant siyasətinə qarşı çıxaraq gəlmələrə dəstək aksiyası keçiriblər. Aksiya iştirakçıları əllərində Amerika bayrağı və Meksika atributları ilə küçələrə axın ediblər.

Nümayişçilər arasında “Texas üçün Demokratik Konqres”in üzvü Al Qrin də olub.

“Bu ölkədə ən yüksək vəzifədə əyləşənlər elə ən böyük haqsızlıqları edənlərdir. Biz bu ədalətsizliklərə dinc şəkildə etiraz etmək üçün buradayıq. Biz Sosial Müdafiə, tibbi proqram olan “Medicare” tərəfindən qorunduğumuza əmin olmaq istəyirik. Biz həmçinin hər bir insanın istədiyi prosesin tərkib hissəsi olmaq hüququnu qorumaq istəyirik. Mən hamı üçün azadlıq və ədaləti müdafiə etmək məqsədilə buradayam”, – deyə Al Qrin bildirib.

Xatırladaq ki, Donald Tramp 2025-ci il yanvarın 20-də vəzifəsinin icrasına başladıqdan sonra genişmiqyaslı islahatlara start verib. O, ABŞ-Meksika sərhədinə qoşun göndərərək immiqrasiya qanunlarının icrasına kömək etmək üçün federal agentləri ərazidə fövqəladə vəziyyətdə işləməyə çağırıb. Kütləvi miqrant həbsi və deportasiyaları icra edilməyə başlanıb.