Türkiyə meymunçiçəyi virusu ilə bağlı hərəkətə keçdi | Xəstəliyin əlamətləri açıqlandı
Türkiyənin Sakarya bölgəsində Seneqal vətəndaşı meymunçiçəyinə yoluxma şübhəsi ilə karantinə cəlb edilib.
Türkiyə mətbuatının yaydığı xəbərə görə, onun dərisində əmələ gələn qabarcıqlar meymunçiçəyinə yoluxma şübhələrini artırıb və o, Sakaryanın Mərkəzi Xəstəxanasına yerləşdirilib.
Qeyd edək ki, meymunçiçəyinin əlamətləri qızdırma, baş, bel və əzələ ağrıları, şişkinlik, zəiflik, halsızlıq, dəridə qabarcıqlar, öskürək, burun tutulması və titrəmədir. Bu nadir virus insanlara yaxın təmas, eləcə də heyvan vasitəsilə yoluxa bilir.
Xatırladaq ki, bundan əvvəl Pakistanda da meymunçiçəyinə yoluxma halı qeydə alınıb. Afrika İttifaqının Səhiyyə Xidməti meymunçiçəyi virusunun yayılması ilə əlaqədar qitədə sağlamlıqla bağlı fövqəladə vəziyyət elan edib.
Ümumdünya Səhiyyə Təşkilatı meymunçiçəyi xəstəliyinin yayılmasını fövqəladə hal adlandırıb. Təşkilatın son məlumatlarına görə, dünyada meymunçiçəyi xəstəliyinə 77 264 yoluxma və 36 ölüm qeydə alınıb. Bunu 109 ölkə təsdiqləyib.
![icon](/images/loading.png)