Türkiyə onlara şərt qoydu | Hərbi əməliyyatın anonsu verildi

“Suriyada fəaliyyət göstərən PKK/YPG irəli sürülən şərtləri yerinə yetirməsə, onlara qarşı hərbi əməliyyat keçiriləcək”.

Bunu Türkiyənin xarici işlər naziri Hakan Fidan “CNN TÜRK”ə müsahibəsində deyib.

O bildirib ki, Türkiyə hər kəsə aydın olan tələblər irəli sürüb:

“Əgər Suriya hərbi əməliyyat variantı ilə üz-üzə qalmaq istəmirsə, o zaman xarici terrorçular, onların liderləri ölkəni tərk etməlidirlər”.

H.Fidan Suriyanın yeni rəhbərliyinin bölgədə qalan YPG terror təşkilatı üzvlərini məhv etmək üçün son hazırlıqlar gördüyünü vurğulayıb.

Əsəd rejiminin devrilməsindən sonra Suriyada qurulan yeni administrasiyanın mübarizə aparmaqdan çəkinmədiyini deyən H.Fidan bölgədə gələcək qarşıdurmaların qarşısını almaq üçün arzu olunan şərtlərin bəlli olduğunu bildirib.

“YPG-yə verdiyimiz ultimatum aydındır. Təşkilatın qalan üzvləri – Kürdüstan Fəhlə Partiyası və ona bağlı birləşmələr silahlarını aşağı salmalı və Suriyanın yeni rəhbərliyi ilə birlikdə çalışmalıdır. Dəməşq onlarla dialoq aparır. Nəticə olmasa, hərbi əməliyyat hüquqi seçim olacaq. Biz uzun illərdir bu məsələ ilə məşğuluq. İndi Suriyadakı yeni reallıq kontekstində fərqli ssenariləri qiymətləndirərək işimizi davam etdiririk. Suriyanın yeni administrasiyası açıq şəkildə bu problemi tanımalı və ölkəsinin milli təhlükəsizliyini və bütövlüyünü təmin etmək üçün lazımi addımlar atmalıdır. Bu bizim gözləntimizdir. Bununla bağlı danışıqlar davam edir”, – deyə Hakan Fidan vurğulayıb.