Türkiyədə təxribat xarakterli paylaşım edən 261 şübhəli müəyyən edildi

Türkiyədə sosial şəbəkələrdə təxribat xarakterli paylaşımlarla əlaqədar 261 şübhəli şəxs müəyyən edilib.

Bu barədə Türkiyənin daxili işlər naziri Ali Yerlikaya açıqlama yayıb.

O bildirib ki, 261 nəfərdən 37-si tutulub.

“İstanbul Baş Prokurorluğunun apardığı araşdırmalar çərçivəsində bəzi sosial media hesabları vasitəsilə İstanbul Böyükşəhər Bələdiyyəsi sədri də daxil olmaqla 106 şübhəli şəxs haqqında həbs qərarı çıxarılıb. Sosial şəbəkələrdə “ictimaiyyəti nifrət və düşmənçiliyə sövq etmək” və “cinayətə təhrik” cinayəti çərçivəsində təxribat xarakterli yazıların hazırlandığı müəyyən edilib.

Həmin paylaşımları 62-si xaricdə olmaqla ümumilikdə 261 şübhəli hesabın etdiyi müəyyən olunub. Kibercinayətkarlıqla Mübarizə Departamentimiz və Təhlükəsizlik Departamentimizin koordinasiyalı işindən sonra 37 şübhəli tutulub və digər şübhəlilərin də saxlanılması istiqamətində işlər davam etdirilir”, – deyə paylaşımda vurğulanıb.

Qeyd edək ki, İstanbul Böyükşəhər Bələdiyyəsi sədri Ekrem İmamoğlu və daha 105 nəfər martın 19-u saxlanılıb. Onlar bir sıra maliyyə cinayətlərində təqsirləndirilirlər.