Ukrayna ABŞ ilə sülh danışıqlarına Avropanı da qatmaq istəyir

Ukrayna administrasiyası ABŞ ilə aparılan sülh danışıqlarına Avropa ölkələrinin də qoşulmasına çalışır.

Bu barədə “The Guardian” qəzeti prosesi yaxından izləyən mənbələrə istinadla məlumat yayıb.

Mənbələrin sözlərinə görə, Ukrayna Prezidenti Volodimir Zelenski ilə ABŞ lideri Donald Trampın görüşü bu həftə Vaşinqtonda baş tuta bilər.

Qəzet yazır ki, son günlər Kiyev və Vaşinqton arasında intensiv telefon danışıqları aparılır və Kiyev Avropanın prosesə rəsmi şəkildə daxil olmasına çalışır.

Böyük Britaniyanın Baş naziri Kir Starmer artıq bildirib ki, Ukraynanı dəstəkləyən “istəklilər koalisiyası” 25 noyabrda planlaşdırılan videokonfransda ABŞ-nin sülh təkliflərini müzakirə edəcək.

Mənbələr həmçinin iddia edib ki, Ukrayna tərəfi Vaşinqtonun təqdim etdiyi sülh planında ciddi dəyişikliklərə nail olub. Kiyev üçün qəbuledilməz olan müddəaların bir qismi çıxarılıb və sənəd ilkin 28 bənddən 19-a endirilib.